Қытайлықтар мыңдаған жылдар бойы ай күнтізбесін пайдаланып келді, Қытай Халық Республикасы құрылғаннан кейін ғана христиандық жыл санау, яғни күн күнтізбесі енгізілген. Сол уақыттан бері Қытайда 1 қаңтарда – Жаңа жыл, 8 наурызда – Халықаралық әйелдер күні, 1 мамырда – Халықаралық еңбек күні, 4 мамырда – жастар мерекесі, 1 маусымда – Халықаралық балалар күні (балалар үшін демалыс күні), 1 шілдеде – Қытай Коммунистік партиясының құрылған күні, 1 тамызда – Қытайдың халықаралық азаттық әскерінің құрылған күні, 1 қазанда – Қытай Халық Республикасының құрылған күні тойланады. Ресми мемлекеттік мерекелермен қатар Қытайдың көптеген аудандарында, көптеген этникалық топтар арасында өздерінің жергілікті мерекелері аталып өтіледі.

Қытай жаңа жылы. 12 қаңтар мен 19 ақпан аралығы қытай күнтізбесінде аса маңызды күндердің бірі болып саналады. Осы уақыт жыл басындағы жаңа туған айға сәйкес келеді. Грегориан күнтізбесі енгізілгеннен кейін бұл мерекені батыстық жаңа жылдан ажырату үшін “Көктем мерекесі” деп атайтын болды. Бұл мерекеде адамдар егін бітік шықсын деп, бір-біріне ізгі тілектер айтып, сыйлық тарту етеді. Қытайлықтар бұл мерекені отбасымен бірге тойлайды, бір-біріне қонаққа барады, мол дастарқан жаяды. Балаларға жолы болсын деп, кішкентай қызыл конвертке салынған ақша ұсынады. Сондай-ақ қытайлықтар аспанға көтеріліп, жақындарының рухына қосылсын деген оймен өздері бейнеленген суреттеріне күйе жағып өртейді. Туыстарына тек жылы сөздер айтсын деген ниетпен еріндеріне бал жағып, бір-біріне әр түрлі тәтті тағамдар ұсынады. Қытайда отбасы құдайы мен есіктер құдайы ерекше құрметке ие. Үйге әбілеттер кіріп кетпеу үшін, есіктің сыртына екі әскердің суретін іліп қояды, олардың қаһарлы түрі жындарды шошытады деп сенеді. Ал көшеде дәстүрлі арыстан биін билейді.

Қайық - айдаһарлар мерекесі. Ай күнтізбесі бесінші айының бесінші күнінде өте көне мереке тойланады. Бұл күні бамбук жапырақтарына оралған, күріштен жасалған кішкене пирамидалар жеу керек. Балалардың мойнына іші жусанмен толтырылған, арыстанның суреті бейнеленген түрлі-түсті тұмарлар тағылады. Олар әбілеттерді қуып, жолын ашады. Айдаһармен әшекейленген қайықтар жарысы ұйымдастырылады.

Ай немесе егін мерекесі. Сегізінші айдың он бесінші түнінде (қыркүйек) аталып өтілетін бұл мереке Тан династиясы дәуірінде өмірге келген және қытай күнтізбесінде аса маңызды орын алады. Бұл – Ай құдайына табынатын күн. Дәстүр бойынша, бұл күні қытайлықтар ерекше тәтті тоқаштар жейді және айдың жарығымен өлең оқиды. “Ай шелпектері” қытай халқының монғол шапқыншылығына қарсы көтерілісін еске түсіреді, өйткені бірнеше ғасыр бұрын осындай тоқаштардың ішіне салынған кіші-гірім хаттар бүліншілікке және басқыншыларға бойсұнбауға шақырған. Бұл күні ғашықтар құдайлардан өздерін ай сияқты бір бүтінге айналдырып қосуын сұрайды. Барлық жерде кішкентай түрлі-түсті шамдар сатылады: кешке қарай қала саябақтары мен егіс далаларында ата-аналар балаларымен бірге оларды жағады.

Конфуцийдің туған күні. Көне философ қытай өркениетінің дүниетанымына аса зор ықпал етті. Конфуцийлік әдеп бес ізгілікке: мейірімділік, әділеттілік, туралық, парасаттылық және адалдыққа негізделген өзін-өзі тәрбиелеуге шақырады. Конфуцийшілдік көптеген ғасырлар бойы мемлекеттік идеологияның негізі болып келді және соңғы кезде жоғалтқан құндылықтарын қайта жаңғыртып жатыр.